ألــصـقـار

ما ادري ليش تذكرت ابو عجيب لما سألوه وش مواصفات شريكة حياتك قالهم اي شي 😂. لا لا طبعا امزح بس ما اعرف ليش طرى على بالي وماحبيت تقولوا عني نفسية 😂. المهم هذا انا: قبيلي وحيد اهلي والدي توفى وانا مراهق وتحملت البيت والوالدة من بدري واضطريت الغي دراستي الجامعية واشتغل كنت مخير اكمل دراسة في الخارج واترك الوالدة او اقعد معاها. ثم توفت والدتي وعشت فترة طويلة لحالي. انا في الأساس من مواليد الدمام بس عشت فترة في الخارج بسبب بعض اعمال والدي وايضا للدراسة قبل ما اوقف. رجعت الدمام من فترة طويلة للعمل والآن أنا إداري في شركة بين الدمام ودبي وعملي الخاص في المنطقة الشرقية. الحمد لله وظيفتي ممتازة وعندي بعض الأشغال الخاصة بي والحمد لله وضعي المادي اقدر اقول ممتاز. حالتي الاجتماعية متزوج من جنسية عربية بسبب معرفتي لوالدها لكن مع وقف التنفيذ 😂 لا اللي ساكنين مع بعض ولا اللي نشوف بعض دايم لانها بين كندا وبلدها والحياة ماشيه ونتقابل كل كم شهر. اللي راح ارتبط فيها ماراح اقبل ان تكون الا من ديرتي او المحيط اللي ساكن فيه يعني حولك حواليك لان العادات متشابهه ممكن في اضيق الحالات بس بشرط السكن معي في الدمام. محب كثير للسفر كنت ما افوت اي اجازة لو اسبوع وأطير بس خلاص ركدت الفترة الاخيرة لانه اندبلت كبدي ماغير ادربي راسي ما معي احد. بالنسبة لسكني فأنا لوحدي محد حولي الا بعض الاهل او الأصحاب اللي يزوروني. علاقتي مع اهلي وقبيلتي شبه محدودة لوجود بعض المشاكل القديمة. تعبت من السكن لحالي والاكل لحالي والطلعات لحالي احب الفعاليات والمقالب 😂 عشان كذا ودي اقلب البيت برنامج الحصن 😂. الحمد لله اني من جيل تربينا على الخير والصدق والامانة والمحبة والصراحة. نخجل من الغلط حتى لو ما سويناه. صحيح تذكرت انا حاط اني مدخن بس انا موقف من زمان بس احيانا مع الضغوط تهف نفسي على حبة دخان وحتى ما أكملها. وبانسبة لوزني زاد في الفترة الأخيرة لأني اهملت النادي بس ان اشاء ارجع مره ثانية. المستحيلات بالنسبة لي هي لا اشوف احد يسألني عن سنابي او تواصل خارج الموقع وما عندي سواليف التعارف والمراسلات فترة طويلة وخرابيط المسيار والسري وهذي الأمور اللي ما اعرف من وين طلعت سلامات ما اظن اللي باخذها ناقصها شي او ترضى على نفسها هالشي. اذا الله كتب تكون المراسلة على الخاص هنا واذا فيه توافق واتقدم رسمي وبصراحة بعطي هذا الموقع فترة كم شهر اذا ما صار نصيب حذفت الحساب. اتوقعت اني لخصت حياتي في كم سطر وكل اللي كتبته طالع مني بكل صدق ولا راح أرجع اقراه ولا قلبي مليان كلام بس اخاف اطلع عن الدرب 😂 اذا قلت القليل أخاف نسيان الكثير أما إذا قلت المهم فأخاف نسيان الأهم. الغريب البعض يراسلني ويختفي هذا وش سالفته 🤔 ومو كاتب اي شي عنه في ملفه انا وش ابي بعمرك ولون بشرتك. ولا اللي تراسلني وتشرط بدون انجاب خير ان شاء الله. ربي يوفقكم جميعا واسأل الله ان يحقق لكم امنياتكم. تحديث: غبت فترة طويلة عن الموقع واليوم رجعت واحس الوضع محد جاد وحذفت كل الرسائل وبعضها بدون ما اشوفها لأنها قديمة لكن بخليها مستميته الى اخر لحظة. وبما ان الوضع كذا بكتب يومياتي افرغ فيها طاقتي. اليوم ٢٢ رمضان قررت اسوي لقيمات لأني ما اذكر متى اخر مرة اكلتها المهم سويت كل شي مثل اليوتيوب لكن اللقيمات صارت قنابل صارت تطير في المطبخ مثل الفشار 😂. اليوم ٢٤ رمضان وباقي مستمر واحس فيه تحسن لكن التقديم لك عليه اللقيمات كأنهم جنايز في الصحن قاعد اكل واستغفر. اليوم ٢٥ رمضان حبيت اغير وقلت اسوي اصابع جبن شريتها مفرزنه بس بدل ما تكون اصابع جبن صارت اصابع غوريلا. اليوم ٢٦ رمضان ما سويت ولا شي لأني خلاص استسلمت 😭.